Астана - Баку әуерейсі қашан ашылатыны белгілі болды

Қазақстан мен Әзірбайжан астаналары арасында тікелей рейстер қайта ашылады, - деп хабарлайды Тengritravel.kz тілшісі.

ҚР ИИДМ Азаматтық авиация комитеті баспасөз қызметінің мәліметінше, еліміздің әуе саласының мамандары Әзірбайжан Республикасының авиациялық билік орындарымен бірлесіп, халықаралық қатынасты қайта бастау және ашу жөніндегі жұмыс шеңберінде "Әзірбайжан Хава Йоллары" әуе компаниясының Баку - Астана және Баку - Алматы бағыттары бойынша тұрақты жолаушылар рейстерін қайта жаңғырту мәселесін пысықтады.

Осылайша, Әзірбайжан әуе компаниясы ағымдағы жылдың 10 наурызынан бастап Баку – Астана бағыты бойынша аптасына 2 рейс жиілігімен (бейсенбі, сенбі күндері), сондай – ақ ағымдағы жылдың 11 наурызынан бастап Баку-Алматы бағыты бойынша аптасына 2 рейс жиілігімен (сәрсенбі, жексенбі күндері) тұрақты жолаушылар рейстерін қайта бастауды жоспарлап отыр. Рейстер А-319/Е-190/Б-757 типті әуе кемелерінде орындалатын болады.

Қазақстан мен Әзірбайжан астаналары арасындағы әуе қатынасын қалпына келтіру екі ел арасындағы сауда-экономикалық, инвестициялық, туристік және мәдени-іскерлік ынтымақтастықты одан әрі дамытуға ықпал ететін болады.

Осыған дейін AZAL әуекомпаниясы 16 наурыздан бастап әуекомпания Баку - Астана - Баку бағыты бойынша рейстерді орындайтыны айтылған еді.