Қазақстандықтар тағы бір елге визасыз бара алуы мүмкін

Қазақстан мен Марокко қазақстандықтарға Мароккода 30 күнге дейін визасыз жүруге мүмкіндік беретін визасыз режим туралы келісім жасауға дайындалып жатыр, - деп хабарлайды Tengritravel.kz тілшісі.

"Ашық НҚА" порталында құжат жобасы жарияланды. Оған сәйкес, "бір тарап мемлекетінің азаматтары жарамды жалпы ұлттық/жалпыазаматтық паспорттар негізінде екінші тарап мемлекетінің аумағына келу, кету, транзитпен өту, уақытша болу үшін визалық талаптардан босатылады, бұл жағдайда әрбір болу кезеңінің ұзақтығы олар келген күннен бастап 180 күн ішінде күнтізбелік 30 күннен аспауы тиіс".

Бұған дейін, 2024 жылғы 26 ақпанда Қазақстанның республикалық бюджет комиссиясы "ҚР Үкіметі мен Марокко Корольдігінің Үкіметі арасындағы ұлттық/жалпыазаматтық паспорттардың иелерін визалық талаптардан босату туралы келісімге қол қою туралы" Үкімет қаулысының жобасын қолдады.

Келісім екі елдің азаматтарын визалық талаптардан өзара босатуды қарастырады. Бұл екі елдің ұлттық немесе жалпы төлқұжат иелері екі елге де визасыз бара алатынын білдіреді. Бұл - саяхатты жеңілдетеді және қызықты ете түседі.

Бұл Қазақстан мен Марокко арасындағы ынтымақтастықтың жаңа мүмкіндіктерін ашады. Визалық талаптардан өзара босату туризм индустриясын дамытуға, іскерлік ынтымақтастық пен кәсіби тәжірибе алмасуды жеңілдетуге ықпал етеді. Бұл туристер санының артуына, екі ел арасындағы іскерлік байланыс пен мәдени алмасудың жақсаруына әкеледі деп күтіледі.

Қаулы жобасы 2024 жылдың 25 маусымына дейін жалғасатын қоғамдық талқылауға шығарылды. Бұл азаматтар мен мүдделі тараптарға мәселе бойынша өз пікірлері мен ұсыныстарын білдіруге мүмкіндік береді.

Саяхат қызықтары мен пайдалы ақпаратты Instagram және Facebook парақшаларынан оқи аласыз!