Еурокомиссия Қазақстандағы ұшу қауіпсіздігінің деңгейін бағалады

Еуропалық комиссия Қазақстандағы ұшу қауіпсіздігінің деңгейін бағалады, - деп хабарлайды Kaz.tengritravel.kz тілшісі Қазақстанның Авиациялық әкімшілігіне (ААК) сілтеме жасап.

Азаматтық авиация комитетінің төрағасы Талғат Ластаев пен "Қазақстанның авиациялық әкімшілігі" АҚ бас директоры Каталин Раду Еуропалық комиссиямен, ұшу қауіпсіздігі жөніндегі Еуропалық агенттікпен (EASA) және Еуропалық Одақ мүшелері мемлекеттер өкілдерімен кездесті. Еуропалық делегацияны Еуропалық комиссияның ұшу қауіпсіздігі бөлімі басшысының орынбасары Питер Соренсен басқарды.

"Қазақстандық тарап ұшуды пайдалану, ұшуға жарамдылық, авиаперсоналды лицензиялау және Қазақстандағы ұшу қауіпсіздігінің деңгейін жақсарту бойынша ҚАӘ процестерін стандарттау бөлігінде қабылданған шаралар мен іске асырылып жатқан түзету іс-қимылдарының жоспарлары туралы хабардар етті. Оның ішінде ҚАӘ қаржыландырудың жаңа тәсілін енгізу және Қазақстандағы азаматтық авиация саласын реттеудің еуропалық моделіне одан әрі жоспарлы көшу бөлігінде Қазақстан Республикасының қолданыстағы заңнамасына күтілетін өзгерістер таныстырылды", - делінген хабарламада.

Еуропалық тарап жүзеге асырылып жатқан іс-шаралар бойынша Қазақстан Республикасының авиациялық билігі қабылдап жатқан шараларды оң қабылдады. 

Еуропалық Комиссия делегациясының басшысы 2019 жылдан бастап Қазақстанда іске асырылып жатқан азаматтық авиацияны реттеудің еуропалық моделін жоғары бағалап қолдады және бұл ұшу қауіпсіздігінің еуропалық стандарттарына толық сәйкес келетін әлемдегі ең озық және ең тиімді тәсілдердің бірі болып табылатынын атап өтті. Сондай-ақ Қазақстанда тұрақты авиациялық реттеушінің жұмыс істеуі және елдегі ұшу қауіпсіздігін қамтамасыз ету жөніндегі міндеттемелерді орындау үшін ҚАӘ ресурстарын қаржыландыру мен қамтамасыз етудің жаңа тетігін тиімді іске асыру қажеттігі атап өтілді.

Сондай-ақ, Еурокомиссия ұшуға жарамдылық, ұшуды пайдалану, әуе персоналын лицензиялау, ұшу қауіпсіздігі басқармасы, ҚАӘ процестерін стандарттау және ұйымның жаңартылған құрылымы салаларында атқарылған жұмыстардың барысын оң бағалап, осы бағыттағы жұмысты жалғастыруға шақырды. Еуропалық тарап осы мәселелерде жан-жақты қолдау көрсетуге дайын екендігін білдірді.

Қазақстанның авиациялық биліктері ұсынған прогресс негізінде Еуропалық комиссия өкілдері бүгінгі күні қазақстандық авиакомпанияларда Еурокомиссияның ұшу қауіпсіздігі тізіміне (қара тізім) және Еуропаға ұшуға қандай да бір шектеулер енгізу бойынша қауіптер жоқ екенін растады.

Еліміздегі жəне əлемдегі жаңалықтар жайында толық мəліметті таба аласыз. Instagram-дағы Kaz.tengritravel.kz-ке қосылыңыз!