Туристерге круиз кемеден үй сатып алу ұсынылды

Storylines компаниясы бүкіл әлем бойынша саяхат жасайтын круиз кемеде үй сата бастайды. Кеме 2024 жылы ұзақ сапарға аттанады, - деп хабарлайды Kaz.tengritravel.kz тілшісі Тravel and Leisure сайтына сілтеме жасап.

Ұзындығы 225 метр және ені шамамен 30 метр болатын жоғары деңгейлі MV Narrative лайнері бүкіл әлем бойынша саяхаттауға дайындалып жатыр. Онда әлемді зерттеген кезде өмір сүргісі, жұмыс істегісі келетін және көңіл көтергісі келетін саяхатшыларға сатып алуға болатын, толық жиһазбен жабдықталған 547 тұрғын үй болады.

Көптеген үйдің ауданы 72-ден 600 шаршы метрге дейін, бір-төрт жатын бөлмесі мен балконы бар. Жағалау немесе заманауи стильде безендірілген. Мұндай пәтер иелеріне 1-ден 8 миллион долларға дейін (490 миллионнан үш миллиард 920 миллион теңгеге дейін), сондай-ақ 12 жылдан 24 жылға дейінгі мерзімге жалдау кезінде 400 мың долларға (196 миллион теңге) қолжетімді бірқатар үй бар.

Круиз компаниясының мәліметінше, тамақтану да жоғары деңгейде болады. Лайнерде 20 мейрамхана мен бар дайындалады. Борттағы ойын-сауықтарға кітапхана, кинотеатр, өнер студиясы, боулинг және басқалар кіреді.

Кеме үш жыл ішінде әлемді айналып, жолаушылар барлық құрлыққа барады. Тұрғындар әр бағытты зерттеп, жергілікті мәдениетті тану үшін бірнеше күн болады. Кеме қарапайым отынға қарағанда экологиялық таза сұйытылған газбен жұмыс істейді.

Еліміздегі жəне əлемдегі жаңалықтар жайында толық мəліметті таба аласыз. Instagram-дағы Kaz.tengritravel.kz-ке қосылыңыз!