Сеулде 275 жолаушысы бар пойыз рельстен шығып кетті

07 қараша 2022 09:13

Оңтүстік Корея астанасы Сеул қаласында пойыздың рельстен шығып кету салдарынан кем дегенде 30 адам жарақат алды, - деп хабарлайды Ренхап ұлттық теміржол корпорациясына (KORAIL) сілтеме жасап.

"Сеул орталығында пойыз рельстен шығып кетіп, соның салдарынан 30 адам жарақат алды", - делінген хабарламада.

KORAIL мәліметінше, зардап шеккендердің көбісі жеңіл жарақат алған. Апат болған кезде пойызда 275 жолаушы болған.

Агенттік мәліметінше, оқиға жергілікті уақыт бойынша 20:52-де болған, пойыз қала орталығындағы станциялардың біріне жақындап келе жатқан. Алты теміржол вагоны рельстен шығып кеткені айтылады, оның бесеуінде жолаушылар болған.

Басылым мәліметінше, апатқа байланысты осы тізбекте пойыз қатынасы бір сағаттан аса уақытқа тоқтаған. Қазіргі уақытта KORAIL оқиғаның мән-жайын анықтап жатыр.