Жолаушының ұшақ бортындағы оғаш әрекеті желі қолданушыларын ашуландырды

Желіде Остиннан Лос-Анджелеске (АҚШ) ұшып бара жатқан ұшақ бортында оғаш әрекет жасаған жолаушының видеосы тарады, - деп хабарлайды Tengritravel.kz тілшісі.

Видеода ер адам орындығының үстіне шығып, арқалығын теуіп жатқаны көрінеді. Бұл сәтті Калифорнияның Сан-Диего қаласының тұрғыны Джино Галофаро түсіріп алған. Ол шудан оянып кетіп, тәртіпсіз жолаушыны тыныштандырыуға мәжбүр болғанын айтты.

Daily Mail басылымының мәліметінше, агрессивті жолаушыны соңында байлап тастаған.

Пост астында бес мыңнан аса пікір жазылған. Пайдаланушылар мұндай мінез-құлықты түсінбейтіндерін жеткізді.

"Неге адамдар мұндай?", "Осылай жасауға қалайша дәті жетеді?", "Оның есі дұрыс па?" – деп ашуланды желі қолданушылары.

United Airlines компаниясы мәліметінше, ұшақта 76 жолаушы мен бес экипаж мүшесі болған. Оқиға 16 қарашада болған.

"Бір жолаушы агрессивті әрекет жасағаннан кейін, Лос-Анджелестің халықаралық әуежайына келгенде ұшақты полиция қарсы алды. Біз экипажымызға жедел әрекет етіп, борттағы барлық адамның қауіпсіздігін қамтамасыз еткені үшін алғысымызды білдіреміз. Бұл жолаушыны қара тізімге енгізіп, болашақта United Airlines қызметін пайдалануға тыйым салдық", – деп келтірді компанияның сөзін Daily Mail.

Медиа мәліметіне сәйкес, ер адамның мұндай мінез-құлық көрсетуіне не себеп болғаны әлі белгісіз.

Саяхат қызықтары мен пайдалы ақпаратты Instagram және Facebook парақшаларынан оқи аласыз!