Дубайда Рамазан айына дейін қандай шектеулер болады?

Дубайда коронавирус пандемиясына байланысты 2-26 ақпан аралығында енгізілген шектеулер Рамазан айы басталғанға дейін ұзартылды, - деп хабарлайды Kaz.tengritravel.kz порталы tourweek.ru сайтына сілтеме жасап. 

Аймақта енгізілген шектеулер қонақүй, дәмхана, мейрамхана, сауда орталығы және басқа қоғамдық орындардың жұмысына қатысты болып отыр. Дубай билігі ақпанда қабылданған шаралардың  тиім болғанын атап өтті. Өйткені күніне COVID-19 жұқтыру жағдайы азая бастаған.  Сондықтан шектеу шаралары ұзартылды.

Дубайда 12 сәуірге дейін мынадай антиковид шаралары сақталады:

• Кинозалдарды, ойын-сауық және спорт контенті бар мекемелерді қоса алғанда, жабық ғимараттар ашық болады, тек келушілер саны 50 пайыздан аспау керек;
• Қонақүйлердің ішіндегі сауда залдары, қонақүйлер, бассейндер және жеке жағажайлар қалыпты ережелерге сәйкес адам кіргізе алады, тек келушілер саны 70 пайыздан аспау керек;
• Тамақтану орындары, соның ішінде мейрамханалар мен дәмханалар сағат 01:00-де жабылады;
• Барлар мен пабтарға жұмыс істеуге тыйым салынады;
• Міндетті түрде бетперде киіп, әлеуметтік қашықтық сақтау керек.