Жолаушылар Алматыдан Wizz Air рейсінің кешігуіне шағымданды

2021 жылғы 17 желтоқсанда Wizz Air Abu Dhabi әуекомпаниясымен Алматы - Абу-Даби бағыты бойынша жаңа халықаралық рейстің ашылу рәсімі өтті. Алматыға рейс ұшып келді. Алайда техникалық себептерге байланысты кері рейс бір тәулікке кешіктірілді. Неліктен рейс кейінге қалдырылды және мұндай жағдайда қазақстандық жолаушыларға не істеу керегін Kaz.tengritravel.kz тілшісі түсінуге тырысты. 

Алматылық Алексей Курапов Facebook желісінде Абу-Дабиге рейстің әр сағат сайын кешігіп, адамдарға күні бойы әуежайда күтуге тура келгенін жазды. Содан кейін рейс, тіпті, бір күнге шегерілді.

"Лоукостер Алматыдан БАӘ-ге жаңа рейстермен жеткіземіз деп көп уәде етті. Адамдар алданып қалды. Кеше олар күні бойы портта отырды, рейс қайта-қайта кейінге қалдырылды, өкілдері жоқ, ешкім ештеңе айтпайды, тамақ бермеді. Нәтижесінде рейсті бір тәулікке шегеріп, бәрін үйіне қайтарды", - деп жазады ол постта.

Сонымен қатар, жолаушының айтуынша, рейстің кешігуі туралы хабарламалар бір сағатқа кешігіп келген. Алексейге сағат 12.37-де хабарлама келген және онда рейс кешіктіріліп, сағат 11.50-де ұшатыны жазылған.

 

ҚР ИИДМ Азаматтық авиация комитетінің мәліметінше, кешігу техникалық себептерге байланысты орын алған.

"Wizz Air лоукостерінің ұшағы келесі күні, 18 желтоқсанда, сағат 12.00-де ұшып кетті. Техникалық себеп болды. Ең алдымен қауіпсіздік маңызды", - деп хабарлады ведомствоның баспасөз қызметі.

Wizz Air Abu Dhabi компаниясының баспасөз қызметі 5W 7078 ala-AUH рейсі техникалық себептерге байланысты 24 сағаттық кідіріспен ұшқанын хабарлады.

"Қауіпсіздік пен жайлылық - бірінші кезектегі міндет. Біз кейде клиенттердің жоспарларына әсер етуі мүмкін кідірістерге, кестенің өзгеруіне немесе күшін жоюға әкелетін күтпеген жағдайларға кезігеміз. Мұндай жағдайларда біздің мақсатымыз әрқашан клиенттеріміздің жайлылығы және оларға біздің тарапымыздан барлық қажетті ақпарат пен қызметті ұсыну болады", - делінген хабарламада.

Компания рейс кешіктірілсе, жолаушыларға жайлылықты қалай қамтамасыз ететінін түсіндірді.

"Егер рейс бес сағаттан астам уақытқа кешіктірілсе, біз клиенттерімізге тамақ немесе сусын ұсынамыз. Егер ұшу уақыты келесі күнге ауыстырылса, біз қонақүйде тұруды және қонақүйден/әуежайға тасымалдауды ұсынамыз. Егер қандай да бір себептермен қонақүйде тұру ұйымдастырылмаса, клиенттер брондауды өз бетінше рәсімдей алады және түбіртектерін қолдана отырып шағым жасай алады, ал Wizz Air бұл соманы клиентке қайтарады", - деп жазды компанияның баспасөз қызметі.

Сонымен қатар, әуекомпания жолаушы ұшқысы келмесе немесе кідіріс оның жоспарларына айтарлықтай әсер етсе, не істеу керегін түсіндірді.

"1. Брондауды алып тастау және егер рейс тоғысуды, сондай-ақ Wizz Air немесе басқа лоукостер арқылы жолаушының ұшуының бірінші нүктесіне кері рейсті қайта брондауды көздейтін болса, күші жойылған рейстің немесе оның бір бөлігінің құнын өтеп алу.

2. Брондауды алып тастау және тиісті секторлар үшін жолаушыға ақы төлеудің толық құнына және төленген тарифтің 20 пайызына ваучер алу. Жолаушы келесі 12 ай ішінде кез келген Wizz Air рейсін төлеу үшін осы кредитті пайдалана алады.

Егер біздің клиенттеріміз қызметке наразы болса, олар шағымды электрон пошта арқылы жібере алады немесе біздің байланыс орталығымызға хабарласа алады. Көмектесуге дайынбыз", - делінген компанияның хабарламасында.

а

Ең маңызды жаңалықтар - біздің Facebook парақшамызда! Дəл қазір жазылып алыңыз!