Жамбыл облысында тау-шаңғы базасы ашылды

06 ақпан 2023 15:54

Жамбыл облысының Жуалы ауданында "Көксай" этно-туристік кешеніндегі тау-шаңғы базасы ашылды, - деп хабарлайды Tengritravel.kz тілшісі өңірлік әкімдік баспасөз қызметіне сілтеме жасап.

Базаның шаңғы жолағы осы спорт түріне жаңадан әуестене бастаған адамдар үшін өте қолайлы жасалған. Оның аумағында шаңғылар мен сноубордтарды жалға беру пункті (100 бірлік), шолу алаңы, дәмхана орналасқан.

Облыстағы туристер ағынының артуын ескере отырып, жыл бойы үздіксіз қызмет ететін туризм кластерін дамыту жоспарлануда. "Көксай" кешенінде қыс мезгілінде ғана емес, жазғы демалысқа да тиісті жағдайлар жасалған. Мұнда үлкен этно-ауыл, қонақ үй кешені, мейрамханалар салынған. Демалыс орталығы күніне 500 адамды қабылдай алады. Нысан күн батареялары арқылы толықтай электр қуатымен қамтылған. Туристік жоба бойынша 40 жаңа жұмыс орны ашылмақ.

Сурет gov.kz сайтынан

Салтанантты ашылу рәсіміне аймақ басшысы Нұржан Нұржігітов қатысты. Әкім өз сөзінде жергілікті жердің ауа-райы, табиғаты туризмді дамытуға қолайлы екенін атап өтті.

"Шаңғы базасының қысқы спорт түрлерімен және ашық ауада серуендеуді ұнататындар үшін таптырмас орын болатыны сөзсіз. Мұнда жамбылдықтар ғана емес, көршілес облыстардың тұрғындары демала алады. Келушілердің қысы-жазы демалуы үшін барлық жағдай жасалған. Облыс аумағында туризмді дамытуға ерекше көңіл бөлінуде. Өткен жылы Тараз еліміздің қалалары арасында бірінші болып Дүниежүзілік қолөнершілер қалаларының тізіміне ресми түрде енді. Өңірдің тарихи-мәдени әлеуетін ескере отырып, туристік инфрақұрылымды дамыту жұмыстарын жүйелі түрде жүргізетін боламыз", - деді облыс әкімі.

Сурет gov.kz сайтынан

Нұржан Нұржігітов жергілікті билік осындай жобаларды, соның ішінде инженерлік-инфрақұрылым тарту мәселесіне қашанда қолдау көрсетуге дайын екендігін баса айтты.

Сурет gov.kz сайтынан