Алакөлдегі Үржар әуежайы қандай әуе рейстерін қабылдайды

Қазақстанның төрт қаласынан ұшақтар Алакөл көлінің шығыс жағалауына, Үржар қаласына ұшатын болады, - деп хабарлайды Kaz.tengritravel.kz тілшісі "ШҚО жолаушылар көлігі және автомобиль жолдары басқармасы" мемлекеттік мекемесіне сілтеме жасап.

"Алакөл көлі жағалауының алдағы туристік маусымына қарай Үржар ауылы әуежайының Нұр-Сұлтан, Алматы, Өскемен және Семей қалаларымен күнделікті әуе қатынасы жаңартылады", - делінген ведомствоның Kaz.tengritravel.kz тілшісінің ресми сауалына берген жауабында.

Ведомствоның мәліметінше, бүгінде әуежайда құрылыс-монтаждау жұмыстары аяқталып, ұшу-қону жолағы ұзартылды, рульдеу жолы салынды, тұрақ орындары кеңейтілді, ұшуларға жерүсті қызмет көрсету объектілері салынды. Жақын арада жарық-сигнал жабдығын орнату жоспарланған.

"Әуежай жолаушыларын қолайлы сервиспен қамтамасыз ету үшін Үржар ауданының әкімдігі аэровокзал ғимаратын қайта жаңғырту бойынша жұмыс жобасын дайындау мәселесін пысықтап жатыр. Оның өткізу қабілетін сағатына 100-150 жолаушыға дейін арттыру көзделген", - делінген хабарламада.

Бұған дейін Алакөл көлінің оңтүстік жағалауына, Үшаралға Нұр-Сұлтан, Алматы, Талдықорған, Түркістан қалаларынан және Ресей Федерациясының қалаларынан ұшақтар ұшатыны айтылған болатын. Рейстердің жиілігі туралы қосымша хабарланады.

Еліміздегі жəне əлемдегі жаңалықтар жайында толық мəліметті таба аласыз. Instagram-дағы Kaz.tengritravel.kz-ке қосылыңыз!