FlyArystan және QazaqAir болашағы бойынша ұсыныстар айтылды

07 қараша 2022 15:47

Бәсекелестікті қорғау және дамыту агенттігі әуе көлігімен жолаушыларды ішкі тұрақты тасымалдау нарығындағы бәсекелестіктің жай-күйіне талдау жүргізді, - деп хабарлайды Kaz.tengritravel.kz тілшісі ведомство баспасөз қызметіне сілтеме жасап.

Агенттік талданатын тауар нарығында бәсекелестікті дамыту бойынша бірнеше ұсыныс нұсқаларын жариялады: Ұсынымдар:

  • әуежайларда жерде қызмет көрсетудің баламалы жеткізушілерінің, оның ішінде тәуелсіз жеткізушілердің әуежайлар аумағында авиаотын сатуға қол жеткізуін қамтамасыз ету;
  • FlyArystan-ды жеке нарық субъектісі ретінде бөлу;
  • "Самұрық-Қазына" ұлттық әл-ауқат қоры" АҚ-ның "QazaqAir" АҚ компаниясының акцияларын сатуы;
  • авиаотынмен биржалық сауда-саттық үлесін ұлғайту;
  • әуе қатынасы туралы халықаралық келісімдер жасасу кезінде Қазақстан тарапынан кемінде 2 авиакомпанияға тасымалдауды жүзеге асыру мүмкіндігін қамтамасыз ету ұсынылады.

БҚДА мәліметінше, Қазақстанда 6 отандық авиакомпания өз қызметін жүзеге асырады. Сонымен қатар, "Жезқазған-Эйр" АҚ, "Жетісу" АҚ және "Оңтүстік аспан" АҚ авиакомпанияларының деректері бойынша әуекомпаниялар Қазақстан Республикасының шекараларында санитарлық және чартерлік рейстерді орындайды және ішкі тұрақты (коммерциялық) рейстерді жүзеге асырмайды. Осыған байланысты, осы талдауда осы авиакомпаниялардың көлемі ескерілмеген.

"Қаралып отырған тауар нарығына жаңа субъектілердің кіруінің негізгі кедергілері экономикалық (бастапқы инвестициялардың көлемі), әкімшілік (авиакомпанияларды тұрақты ішкі коммерциялық әуе тасымалдарын орындауға жіберуге қойылатын талаптар) шектеулер болып табылады. Бұдан басқа, авиаотынның жоғары құнымен, әуежай қызметтерін жеткізушілер арасында бәсекелестіктің болмауымен, әуежайлардың жанармай құю кешендеріне қолжетімділіктің шектелуімен және т. б. байланысты нарықта бәсекелестікті дамытудың бірқатар проблемалық мәселелері бар. Нарықтық шоғырлану коэффициентінің, Герфиндаль-Гиршман нарықтық шоғырлану индексінің көрсеткіштері бойынша тұрақты ішкі әуе тасымалы қызметтерінің нарығы жоғары шоғырлану деңгейі және дамымаған бәсекелестігі бар тауар нарығына жатады", - делінген Агенттік хабарламасында.