"Turkish Airlines" әлемдегі элиталы әуекомпаниялар қатарына қосылмақ

Қазіргі таңда 393 лайнері бар "Turkish Airlines" әуе тасымалдаушылардың әлемдік рейтингінде алғашқы ондықта да жоқ. Дегенмен 2033 жылға дейін компания ұшақтар санын екі есе арттырмақ, - деп хабарлайды Tengritravel.kz тілшісі.

Бұл туралы компанияның басқарма төрағасы Ахмед Болат мәлімдеді. Алдағы он жылда Түркияның әуе тасымалдаушысы 600 жаңа ұшақ сатып алмақ. Алайда олар "Boeing" немесе "Airbus" бола ма, әзірге айтылмай отыр.

"Turkish Airlines" көздеп отырған басты мақсат - жылына 170 миллион жолаушы тасымалдау. Бұл сан әлемдегі ең алдыңғы қатарлы әуе компаниялардың көрсеткіші: "American Airlines" немесе "Delta Air Lines". 2022 жылы түркиялық әуекомпания 72 иллион адам тасымалдапты.

Алға қойған мақсатқа жету үшін ұшақтар саны ғана артып қоймайды, жаңа бағыттар да ашылмақ. Компания трансқұрлықтық бағыттарға бет бұруы ықтимал. Ахмед Болаттың сөзінше, компания биылдың өзінде Сингапурге аздап аялдайтын Аустралияға (Ыстамбұл - Мельбурн) рейсті іске қосуы мүмкін. Ал ұзаққа ұша алатын ұшақтар келісімен, бұл рейс аялдамасыз болады.

Саяхат қызықтары мен пайдалы ақпаратты Instagram және Facebook парақшаларынан оқи аласыз!